त्रिभुवन विमानस्थलभित्र ठूलो दुर्घटना टर्‍यो, मालिन्दो एयर चौरमा भासियो

काठमाडौं । काठमाडौंबाट मलेसियाको क्वालालम्पुरतर्फ उड्न लागेको मालिन्दो एयरको जहाज ठूलो दुर्घटनाबाट जोगिएको छ । उडान नम्बर ओडी १८१ जहाज बिहीबार राति धावनमार्गबाट चिप्लिएर घाँसे मैदानमा पुगेर जोतिएको थियो ।

राति पौने १० बजे टु जिरो अर्थात उत्तरी क्षेत्रबाट दक्षिणी क्षेत्र अर्थात् जिरो टु तर्फ जहाज गइरहेको थियो । मोडिएर पुनः उत्तरी क्षेत्रतर्फ आउने बेला जहाज धावनमार्ग छाडेर करिब १३९ फिट पर पुगेर भासिएको थियो ।

उक्त जहाजमा १३९ यात्रुहरु थिए । चालक दलका सदस्य र यात्रु सबै सकुशल छन् । जहाजको अघिल्लो भाग जमिनमा जोतिएपछि उद्धारकर्मीको टोलीले तत्काल उद्धार गरेका थिए ।

उडान अवतरण प्रभावित

अग्नि नियन्त्रक, एम्बुलेन्स, सुरक्षाकर्मीसहित ठूलो संख्यामा उद्धारकर्मी तत्काल जहाज भएको ठाउँमा पुगेका थिए । उनीहरुले सबै यात्रुहरुलाई ओरालेपछि जहाजलाई पार्किङ क्षेत्रमा लग्ने प्रयास जारी छ ।

फ्लाइट राडारबाट लिइएको तस्वीर

जहाजको अघिल्लो पांग्रा जमिनमा भासिएपछि रातिदेखि नै त्रिभुवन अन्तर्राष्ट्रिय विमानस्थलबाट हुने उडान तथा अवतरण प्रभावित भएकाे छ । अवतरणको तयारीमा रहेका जहाजहरुलाई अन्यत्रै डाइभर्ट गरिएको छ ।

नेपाल नागरिक उड्ययन प्राधिकरणका महानिर्देशक सञ्जीव गौतमले त्रिभुवन अन्तर्राष्ट्रिय विमानस्थलभित्र ठूलो दुर्घटना टरेको बताए ।

यसअघि बंगला एयरको जहाज अवतरणको क्रममा रनवेभन्दा बाहिर पुगेर दुर्घटना हुँदा ५० यात्रुको मृत्यु भएको थियो ।

 oNLINEKHABAR